Ensera Bubut enggau Ruai

Animasyen Jaku Iban

Gambar Kelas

Proses nempa jaku nama, jaku pengawa, jaku adjektif, enggau jaku tugas.

Jaku nama, jaku pengawa, enggau jaku adjektif tau dikumbai raban batang jaku laban ditagaka nyadi teras ngagai batang frasa ayat, iya nya frasa nama, frasa pengawa, enggau frasa adjektif. Kelimpah ari tiga raban batang jaku nya, bisi mega leka jaku bukai ti ulih nyadi teras ngagai tiap-tiap batang frasa. Leka jaku nya ensilup ke dalam pasuk frasa, klausa, enggau ayat ari kaul iya enggau pasuk frasa enggau klausa nya sechara terus. Ari nya leka jaku, kelimpah ari batang jaku nya tadi, tau diripihka ngagai siti raban leka jaku sechara kolektif, iya nya jaku tugas ti betukuh heterogen. Jaku nama nya seraban leka jaku ti tau nyadi leman teras ngagai pasuk frasa nama lalu jaku ti bansa tu endang dikena meri nama ngagai orang, tempat, bansa utai, tauka konsep. Ambika chunto,”lima iku nembiak institut pematih pengajar”. Leka jaku nembiak dalam frasa nya tadi iya leka jaku nama ti nyadi leman teras dalam pasuk tiap-tiap frasa nama. Raban jaku nama tau diripih ngagai tiga bengkah nitihka alan reti leka jaku iya nya jaku nama menyana, jaku nama rama, jaku ganti nama. Jaku akronim mega iya nya siti ari bansa jaku nama. Jaku nama akronim nya leka jaku ti ditempa ari ke besakumka bagi-bagi ti diselit ari dijir leka jaku. Bagi-bagi nya baka urup, patah sebut tauka bagi-bagi ari leka jaku. Leka jaku nama ulih ditempa ngena chara numbuhka enggau nuruka leka jaku. Jaku nama tumbuh iya nya jaku nama ti datai ari asil proses meri penambah, iya nya proses besakumka penambah jaku nama ngagai urat jaku nama. Bisi dua bengkah penambah jaku nama ti ulih besakum enggau lima bengkah urat jaku dikena nempa jaku nama tumbuh. Penambah keturubah iya nya penambah mua. Penambah ti tau dikena nempa jaku nama iya nya baka peN-, pe-, enggau juru. Penambah mua peN- datai dalam empat bengkah penambah iya nya pe-, pem-, pen-, enggau peng-. peN- nyadi pe- lebuh iya besakum enggau urat jaku ti bepun enggau urup m, n, ny, ng, r, I, d, j enggau w. peN- nyadi pem- lebuh besakum enggau urat jaku ti bepun ari urup b. Ba pekara tu, urup keterubah dalam urat jaku nya dipeluluhka. Tang ba jaku injau ti bepun enggau urup v di urup pun agi mengkang dikena. peN- nyadi pen-,lebuh betemu enggau urat jaku ti bepun ngena urup d enggau t,dia urup nya diluluhka. peN- nyadi peny-, lebuh disakum enggau urat jaku ti bepun ngena urup ch, j, enggau s. peN- nyadi peng-, lebuh betemu enggau urat leka jaku ti bepun enggau urup vocal a, e, i, enggau u. peN- bevariasyen enggau pel- lebuh besakum enggau urat jaku ajar kena nanda reti batang pekara ti dipelajar nama pekara ke diajar. Jaku penambah juru- mai reti ngagai urang ti landik be sesebengkah batang pengawa. Penambah selit ulih dibagi ngagaitiga tukuh iya nya –le, -ga, enggau –er. Tukuh jaku selit tu enda produktif lalu tau dianggap siti tukuh ti meku tauka kurang potensi ngerembai. Chunto, sempepat-selempepat, kebembang-kelenbembeng enggau kemayang-kelemayang. Jaku nama turu nyadi ari proses bedijirka dua urat jaku tauka lebih ti mai reti ke meruan sereta entap. Jaku nama turu disepil beserara tang betandan nyadi siti unit. Bisi tiga bengkah jaku nama turi iya nya jaku nama turu ti datai ari frasa meras, jaku turu ti nyadi terminology dalam bidang ilmu, enggau jaku turu ti nanggam reti sempama. Jaku pengawa iya nya leka jaku ti nyadi teras ngagai pasuk tauka konstruk frasa pengawa. Frasa pengawa datai ari jaku pengawa ti tau disempulang mayuh leman jaku bantu, objek, penembu, ayat komplemen enggau penerang. Jaku pengawa tau dibagi ngagai dua raban ti bebatang baka jaku pengawa ukai transitif enggau jaku pengawa transitif. Jaku pengawa mega ditempa ngena chara nuru enggau nandu leka jaku.Jaku pengawa turu datai ari dijir dua morfem meras tauka lebih. Dalam Jaku Iban, tebal agi jaku pengawa turu datai ari jaku nama. Dalam Jaku Iban, jaku turu ari raban jaku nama tau digaga nyadi jaku pengawa ari proses jaku tumbuh. Lebuh jaku turu nerima penambah mua, urat jaku mengkang disepil beserara. Tang lebuh nerima penambah kepit, urat jaku disepil besambung. Jaku pengawa tau ditempa ngena proses betandu, iya nya proses ti betanduka urat jaku lalu nadai ngerampit sebarang penambah. Dalam proses tu, urat jaku deka betandu penuh tauka betandu sebagi. Urat jaku mega tau dipetanduka sereta, iya nya nitihka munyi dakam urat jaku. Betandu penuh iya nya proses betandu penuh urat jaku. Chunto, michit nyadi michit-michit, megai nyadi megai-megai. Betandu sebagi iya nya proses ti betanduka sebagi urat jaku.raban jaku pengawa betandu sebagi nyadi ba urat jaku ti bepenambah, lalu sebagi agi ba urat jaku ti dipetanduka, iya nya bagi ti bepenambah. Tukuh-tukuh tandu iya nya tau diengkah ari mua tauka ari belakang urat jaku. Betandu nitihka rentak iya nya proses betanduka urat jaku nitihka rentak munyi dalam urat jaku. Lebuh betandu nitihka rentak, urat jaku bisi nya dipetanduka penuh nitihka munyi ti sama tauka munyi ti bisi betuja, iya nya sekalika nitihka munyi vokal enggau konsonan ti ditentuka aja. Bisi mega proses betandu ti nadai nitihka munyi vokal enggau konsonan. Jaku adjektif nya datai ari leka jaku ti nyadi leman teras dalam konstruk frasa adjektif. Frasa adjektif tau ditai ari seleka jaku adjektif enggau leman penerang ti bukai baka jaku bantu, tauka jaku penguat. Jaku adjektif mega ulih dikelala tauka dibida ari jaku nama tauka jaku pengawa, ari ti beratika chara iya ditempa. Jaku adjektif ulih ditempa ngena chara meri penambah enggau betanduka leka jaku. Jaku adjektif nerima penambah mua enggau penambah kepit. Penambah mua ti nempa jaku adjektif iya nya nge-, be-, enggau beke-, ti besakum enggau urat jaku adjektif. Penambah mua nge- ti besakum enggau urat jaku adjektif berfungsi nyadi penerang kena bebandingka tauka madahka gaya ti pengabis tauka pemadu. Penambah mua be- ti besakum enggau urat jaku adjektif befungsi nyadi penerang ti madahka seraka enggau antara. Penambah kepit ti nempa jaku adjektif iya nya ng…-ka, ti mai reti nunda. Jaku adjektif betandu ulih ditempa ngena lima bengkah chara, iya nya betandu penuh, betandu patah sebut dulu, betandu urat jaku, betandu patah sebut dudi, enggau betandu berentak. Betandu penuh nya chara nempa jaku adjektif ti pemadu mudah, iya nya betanduka jaku adjektif tunggal kena meri reti tukuh ti selampur. Betandu patah sebut dulu nya chara nempa jaku adjektif ti nekanka patah sebut dulu urat jaku adjektif ti dipetanduka kena meri retiti mantang ngagai urat leka jaku. Betandu urat jaku nya siti agi chara kena nempa jaku adjektif ti nekanka urat jaku ti dipetanduka dikena meri reti ti mantang ngagai urat jaku. Betandu patah sebut dudi nya siti mega chara kena nempa jaku adjektif ti nekanka urat jaku ti dipetanduka dikena meri reti ti mantang ngagai urat leka jaku. Jaku adjektif berentak nya jaku adjektif ti ditempa ngena chara betanduka urat jakuadjektif enggau kaling iya kena ngaga pemanah munyi jaku. Jaku tugas ti datai dalam ayat ukai bekenjing nyadi leman teras dalam predikat sekalika predikat frasa nama, predikat frasa pengawa tauka predikat adjektif. Jaku tugas nya leka jaku tidatai dalam ayat, klausa tauka frasa kena nanggam sesebengkah tugas sintaksis sekalika nyadi jaku penyambung, penerang, penentu, penguat, jaku pun ayat,enggau tugas-tugas bukai. Jaku tugas ulih ditempa ngena chara nyambung ayat. Jaku penyambung ayat nya jaku ti bekenjing besambungka dua pasuk ayat tauka lebih ngambika nyadi siti ayat belapis tauka disebut ayat turu. Bisi dua bansa ayat turu ti nyadi,iya nya ayat turu rakup enggau ayat turu selit. Ayat turu rakup tau disambung enggau leka jaku penyambung tunggal, tang ayat turu selit disambung enggau jaku penyambung selit.